DO’XTIRGA ARZ-DOD
(hazil she’r)
***
Kel, do’xtirjon, dardimizni bo’lishamiz,
Dard tutganda birgalashib so’lishamiz.
Mayli, agar ko’nglingiz cho’kmasin desang,
O’lishdayam birgalashib o’lishamiz.
Kel, do’xtirjon, dardimizni bo’lishamiz.
***
E, baqirma, bemorga hech baqirmaslar,
O. Hayitni “Hayitov” deb chaqirmaslar,
Dilga og’ir botar gapdan gapirmaslar,
Kel, do’xtirjon, dardimizni bo’lishamiz,
Dard tutganda birgalashib so’lishamiz.
***
Xastaman-ku, darrov chopib kelmading-a,
Men g’aribni mundoq ko’zga ilmading-a,
Ming chirandim, baribir do’st bo’lmading-a,
Kel, do’xtirjon, dardimizni bo’lishamiz,
O’lish bo’lsa, birgalashib o’lishamiz.
***
Hay, qanisan, ko’z ko’kardi, ko’rinmaysan,
Murosali bo’lishga hech urinmaysan,
Yalintirib, yolvortirib erinmaysan,
Kel, do’xtirjon, dardimizni bo’lishamiz,
Ja zo’r kelsa, dovlashamiz, urishamiz.
***
Qara, lekin, jahlim chiqsa ketvoraman,
Sen do’xtirning bahridanam o’tvoraman,
Otam aytgan gapni menam aytvoraman,
Kel, yaxshisi, dardimizni bo’lishamiz,
Kelisholsak, bir yo’l topib kelishamiz.
Olimjon HAYIT
