Xitoy Fan va texnologiya universiteti olimlari ko‘z yumilganda ham infraqizil diapazonda ko‘rish imkonini beruvchi kontakt linzalarini ishlab chiqdi. Bu haqdagi tadqiqot “Cell” jurnalida chop etildi.
Ta’kidlanishicha, texnologiya 800-1600 nm diapazonda infraqizil nurni o‘zlashtiradigan va uni 400-700 nm ko‘rinadigan spektrga aylantiradigan nanozarrachalarga asoslangan.
Linzalarning o‘ziga xosligi shundaki, ular tashqi quvvat manbaiga muhtoj emas. Katta hajmli tungi ko‘rish qurilmalaridan farqli o‘laroq, linzalar faqat yorug‘lik to‘lqinlarini aylantirish orqali ishlaydi. Shuningdek, ular ko‘p rangli tasvirni yaratadi. Biroq, yorug‘likning nanozarrachalar tomonidan tarqalishi tufayli tasvir biroz xiralashadi.
Biroq, linzalar faqat yorqin infraqizil manbalarni, masalan, LEDlarni ko‘rishga imkon beradi va zaif nurlanishni kuchaytiradigan qurilmalarni almashtirmaydi.
Mutaxassislar texnologiyada katta imkoniyatlarni ko‘rmoqda. Misol uchun, bunday linzalar jarrohlikda qo‘llanilishi mumkin, bu esa shifokorlarga katta hajmli asbob-uskunalarsiz o‘simtalarni aniqlash imkonini beradi.
Tadqiqotchilar sezgirlik va fazoviy ruxsatni oshirish uchun materialni takomillashtirishni rejalashtirmoqda. Bu qutqaruv operatsiyalarida, xavfsiz ma’lumot uzatishda va boshqa sohalarda linzalarni amaliy qo‘llash uchun yo‘l ochishi mumkin.
Eslatib o‘tamiz, avvalroq singapurlik olimlar ko‘z yoshining suyuqligi bilan zaryadlanadigan linzalarni ixtiro qilgandi.
