Turli mamlakatlarning birinchi xonimlari qanday libos kiyishlari, o’zlarini qabullar va tashriflar vaqtida qanday tutishlari ma’lum qoliplarga solingan tarzda belgilanadi. Prezidentlarning rafiqalari ham ushbu qoidalarga amal qilishlari juda muhim, zotan ularning tashqi ko’rinishlari mamlakat imidjining bir qismi hisoblanadi. Xo’sh, bugungi kunda mamlakatlarning birinchi xonimi sanalmish taniqli ayollar kiyinish borasida qanday qoidalarga amal qilishadi?
Liboslar rangi
Davlat rahbarining rafiqalari tomonidan tanlangan liboslar o’ta yorqin rangda bo’lmasligi kerak. Diqqat bilan qarasangiz, ularning aksariyat qismi sokin rangdagi liboslarga moyillik bildirishlarining guvohi bo’lasiz. O’ta yorqin rangli va tushunarsiz bezaklarga ega liboslar birinchi xonimlar ko’rinishiga putur yetkazib qo’yishi mumkin.
Bosonojka kiyish ta’qiqlanadi!
Mamlakatlarning birinchi xonimlari orasida rasmiy tadbirlarga tufli emas, bosonojka kiyib borish holati deyarli uchramaydi. Ular o’ta issiq va hattoki jazirama havo sharoitlarida ham ochiq ko’rinishdagi poyabzal kiyishlari mumkin emas.
Argentina prezidentining rafiqasi Xuliana Avada ushbu qoidani bir necha bor buzgani uchun dizaynerlar tomonidan keskin tanqid qilingan edi. Uning issiq kunlarda tufli emas, bosonojka kiyishiga diplomatik dress-kod qoidalarini buzish deya ta’rif berilgan.
Zargarlik buyumlari haqida unutamiz!
Mamlakatning birinchi xonimi bo’lmish ayollar orasida yozilmagan qoida mavjud: ular hech qachon omma qarshisida qimmatbaho taqinchoqlar taqib olgan holatda namoyon bo’lishmaydi. Aksariyat mamlakatlarda bu narsa hashamat va boylik bilan maqtanish sifatida baholanadi. Ushbu qoida nafaqat birinchi xonimlar, balki qirollik oilalari a’zolariga ham birday tegishli.
Qimmatbaho zargarlik buyumlarini haddan tashqari tez-tez taqish, liboslar uchun o’ta ko’p pul sarf etish oqibatida ko’plab qirollik oilalari ham odamlar tomonidan tanqid qilingan. Misol uchun Sasseks gersoginyasi Megan Markl ham o’zining qimmatbaho liboslari va zargarlik buyumlari sababli xalqning tanqidiga duchor bo’lgandi.
Sarafan
Sarafan kerakli darajada uzun, sokin rangda, yetarlicha hamyonbop narxda bo’lishi, tufli bilan kiyilishidan qat’iy nazar birinchi xonimlar garderobida aslo bo’lmasligi kerak. Buning sababi, ushbu libosning yuqori qismi yetarlicha yopiq emasligidir. Prezidentlar va qirollarning rafiqalari issiq kunlarda ham yelkalari butunlay yopiq bo’lgan libos kiyib yurishga majburlar. Ularga yengsiz libos kiyish ham ta’qiqlangan, bu xalqaro etiket qoidalariga aslo to’g’ri kelmaydi.
Rang-barang liboslar
Yuqorida tilga olinganidek,birinchi xonimlar garderobidagi aksariyat liboslar sokin ranglarda bo’lmog’i darkor. Liboslarda o’ta jimjimador naqshlar mavjud bo’lishi, shuningdek, obrazda 2-3 hil rangdan ko’pi ishlatilishi ham mumkin emas.
Bundan tashqari, birinchi xonimlar obrazi turmush o’rtoqlarining tashqi ko’rinishiga ham uyg’un tarzda tanlanishi kerak. O’z vaqtida AQShning birinchi xonimi sanalgan Mishel Obama turli tadbirlarga o’ta yorqin, gulli va etnik naqshlarga ega bo’lgan liboslar kiyib borar, bu esa Barak Obamaning liboslariga mutlaqo mos kelmas edi. Shu sababli ham Mishel Obama obrazlari ko’p hollarda mutaxassislar tomonidan jiddiy tanqid qilingan.
