BI-IR KULIShMAYMIZMI?..

 

 

* * *

 

Mehmonxona xo’jayiniga mijozlardan biri dedi:

— Tushunmadim. Mehmonxona haqiga televizorniyam qo’shib qo’yibsiz. Xonada televizor yo’q-ku!

— To’ppa-to’g’ri. Biz televizor sotib olish uchun pul yig’yapmiz.

 

* * *

 

Yangi boyning xotini uy xizmatchisini ishga olayotib undan so’radi:

— Siz to’tiqushlarni yaxshi ko’rasizmi?

— Tashvish tortmang, opajon! Men ovqat tanlamayman!

 

* * *

 

Erkak tanishiga dedi:

— Qiz ko’ribsiz, tabriklayman!

— Rahmat.

— Qizingiz onasiga o’xshaydimi?

— Bilmadim, tili chiqsin-chi, ko’rarmiz!

 

* * *

 

Eshik qo’ng’irog’i jiringladi.

— Kechirasiz, men yangi basseyn uchun xayriya yig’ib yurgandim.

— Gap yo’q, hozir bir chelak suv olib chiqib beraman.

 

* * *

 

Besh yashar bolakay dadasidan so’radi:

— Dada, ichki ishtonimning qaeri oldi, qaeri orqasi?

— Senga yuz marta aytganman. Oq dog’li tomoni oldi. Sariq dog’lisi orqasi.

 

* * *

 

Vrach kichkinagina bolaga ukol qilyapti. U yig’lay boshlagandi, vrach yupatishga tushdi.

— Qara, pashsha! Hov ana!..

Ukol tugashi bilan bolakay yugurib onasiga yopishdi.

— Oyi, pashsha orqamni chaqib qochdi!

 

* * *

 

Besh yashar bola ko’chada konfet yeb o’tirgandi. Bir ayol o’tib qoldi.

— Xola, konfet yeysizmi?

— Mayli.

— Xo’sh, mazalimikan?

— Judayam.

— Qiziq, unda itim nega tupurib tashladiykin?

 

* * *

 

Baliqchi oltin baliq tutib oldi. Baliq so’radi:

— Uchta tilagingni ayt, bajo keltiraman!

— Menga temir-tersak zavodi, zo’r mashina va ko’p xonali kvartira hozirla!

— Kreditga olasanmi, yo naqd pulgami?

 

* * *

 

— Toshmatvoy, mana bu topishmoqni top-chi! Hamma narsani bilib, ko’rib, eshitib turadi. U kim?

— Qo’shnimiz Orzi xola.

 

* * *

 

Foydali maslahat:

— Agar kvartirangizdagi kranlardan suv tomchilayotgan bo’lsa, usta chaqirib ovora bo’lmang! Pastdagi qo’shnining o’zi chaqirib keladi.