Choponingga qo’ngan changni ko’rolsam ham,

Qolganlardan quyuqroq hol so’rolsam ham,

G’azabingni yomon tushga burolsam ham,

Senga he-ech do’st bo’lolmadim, jon jo’rajon.

 

 

Boysan dedim, boylar tomon chopaverding,

Naq enasi o’pmaganin o’paverding,

Ikkiyuzlamachidan do’st topaverding,

Senga he-ech do’st bo’lolmadim, jon jo’rajon.

 

 

U men emas, o’zgaga ham moslashadir,

O’zga ila o’zga tilda so’zlashadir,

Keyin sen-la mushtlab-mushtlab mushtlashadir,

Senga he-ech do’st bo’lolmadim, jon jo’rajon.

 

 

Zamon zayli. Yo’qlaganni yo’qlaydirsan,

Xushomadin qalb to’ringda saqlaydirsan,

Do’qlasang-da, faqat meni do’qlaydirsan,

Senga he-ch do’st bo’lolmadim, jon jo’rajon.

 

 

Chidayman-da, mengayam tong otib qolar,

Oymomajon bag’irchamga botib qolar,

Bozorchilar qo’shimcha yuz sotib qolar,

Senga he-ech do’st bo’lolmadim, jon jo’rajon.

Olimjon HAYIT

 

loading…