Kun kulgisi

Bir bola soqov ekan. Ota-onasi ko’rsatmagan tabibu shifokori qolmabdi. Hech ham gapirmabdi. Oxiri ota-onasi gapirishidan umidini uzishibdi. Bir kuni ovqatlanib o’tirishsa, soqov bola:

— Sho’r ekan, — debdi.

Shunda onasi quvonib ketibdi:

— Voy o’g’lim, gapirdingmi?! Yana bir qaytar…

— Sho’r ekan ovqatingiz!

Ota-ona o’zida yo’q xursand…

— Sen bola gapirarkansan-ku, nega bizni shuncha yil qiynading? Nimaga shu paytgacha indamading?

— Shu paytgacha ovqatingizning tuzi yaxshi edi-da.

* * *

Uch yashar Sardor buvisiga dedi:

— Buvijon! Siz doimo: «Shakarning ham ozi shirin», derdingiz. Bog’chaga shuncha bordim, bo’ldi-da endi!

* * *

Afandi bir joyda to’y bo’lyapti deb eshitibdi, garchi taklif qilinmagan bo’lishiga qaramay, to’yga juda ham borgisi kelibdi. O’ylab-o’ylab bahona topibdi. Bir varaq qog’ozni to’rt buklab, cho’ntagiga solibdi-yu, to’yxonaga otlanibdi. To’y egasiga borib:

— Sizga qozidan xat, — deb qog’ozni beribdi.

To’y egasi quvonib, xatni olib, Afandini to’yxonaga kirgizib, to’rga o’tkazibdi. Afandi esa vaqtdan foydalanib, dasturxondagi noz-ne’matlarni bir boshdan yeya boshlabdi. To’y egasi qog’ozni ochib qarasa, bo’m-bo’sh.

— Qog’ozda hech narsa yozilmagan-ku! — debdi Afandining yoniga borib.

— Ishlari zarur bo’lgani uchun qog’ozga xat yozishga qo’llari tegmadi, — dermish Afandi.

* * *

Ikki yaqin dugona suhbatlashmoqda:

— Eshitishimcha, yigiting bilan ajrashibsizlar!

— Ha!

— Nima bo’ldi? Orangizdan biror gap o’tdimi?

— Masalan, sen har kuni ichadigan, tinimsiz chekadigan, so’kinib gapiradigan va hatto qo’l ko’taradigan odam bilan birga yashay olarmiding?

— Yo’q, albatta!

— U ham bunga chiday olmadi.

* * *

Har kuni ichib, mast bo’lib yuradigan odamdan so’rashibdi:

— Nega har kuni ichasan?

— Unutish uchun.

— Nimani unutish uchun?

— Piyonistaligimni unutish uchun!

* * *

— Dugonajon, kecha erim meni xafa qildi.

— Nega? Nima bo’ldi?

— Go’zallik saloniga 300 ming so’ragandim.

— Bermadimi?

— Menga tikilib qarab turdi-da, 500 ming berdi!

* * *

O’qituvchi bolalarga Oy haqida hikoya qildi:

— Oy juda katta sayyora. U yerda milliondan ziyod odamlar yashashi mumkin.

— Menda bir savol bor, — dedi bir o’quvchi.

— Xo’sh, nima deysan?

— Oy yarimta bo’lib qolganda odamlar qanday sig’ishadi?

Facebook’dagi sahifamizda yangiliklarni kuzatish yanada qulay!

Marhamat! A’zo bo’lish uchun «Nravitsya stranitsa» tugmasini bosing: