Oyga Artemis 1 sinov missiyasining parvozi 2022 yil 12 fevralga mo’ljallangan, deb xabar berdi NASA.
Missiya doirasida Space Launch System (SLS) tashuvchi-raketasi va Orion kosmik kemasi parvozi amalga oshiriladi, deb ma’lum qildi NASA vakili Mayk Sarafin.
Uning so’zlariga ko’ra, Orion kemasi parvozi to’rt haftadan olti haftagacha davom etadi.
Joriy haftada Orion kemasi Kanaveral burnidagi Kennedi nomli kosmik markaz vertikal yig’uv sexida SLS tashuvchi-raketasiga o’rnatildi.
Artemis 1 missiyasi doirasida Orion kosmik kemasi Oyga yo’l oladi va bir necha hafta orbitada bo’ladi. So’ngra kema Yerga qaytadi.
Artemis dasturi 2020 yil sentyabrda e’lon qilingandi. Uning asosiy maqsadi 2024 yilda oyga inson qadami qo’yilishini amalga oshirish, kelajakda Oyni o’zlashtirish uchun sharoitlar yaratishga tayyorgarlik ko’rishdir.
