* * *
Korxona rahbaridan so’rashdi:
— Nega ishga faqat uylanganlarni qabul qilasiz?
— Chunki uylanganlar haqorat, so’kishlarga o’rganib ketgan. Keyin… Yana bir yaxshi tarafi shuki, uylanganlar kechqurun uyga ketishga shoshilishmaydi.
* * *
Besh yashar bolakay ko’chadan yugurib kelib onasiga dedi:
— Oyi, pul bering!
— Nima qilasan?
— Sovg’a olaman.
— Qanaqa sovg’a?
— Yangi yil sovg’asi.
— Ie, kimga atab olasan yangi yil sovg’asini?
— Siz bilan dadamga.
* * *
Bolakayning «Qorbobo, siz haqiqiy Qorbobomisiz?», degan savolidan so’ng Qorbobo bolakayga maxsus ruxsatnoma, soliq idorasidan ma’lumotnoma, litsenziya va shaharda vaqtinchalik ro’yxatda turganligi haqidagi hujjatlarni ko’rsatishga majbur bo’ldi.
* * *
Teleboshlovchi 8 mart kuni e’lon qildi:
— Biz muhtarama ayollarimizni 8 mart bayrami bilan chin ko’ngildan tabriklaymiz va ular uchun «Chelsi» — «Barselona» o’rtasida o’tadigan futbol matchini namoyish etamiz. Bu namoyishimiz faqat sizlar uchun, qimmatli ayollar!
* * *
Tiqilinch avtobusda. O’rindiqda o’tirgan erkak tepasida turgan 80 yashar kampirdan so’radi:
— Ona, shu avtobusda markaziy bozorgacha borvola olamanmi?
— Yo’q.
Erkak shosha-pisha o’rnidan turdi-da, avtobusdan tushib qoldi. Kampir esa uning o’rniga o’tirib o’zicha g’udranib qo’ydi:
— Men esa borvola olaman.
* * *
Restoranda. Mijoz ofitsiantdan so’radi:
— Nega guldondagi gullaringiz sun’iy? Shunday nufuzli restoranga tirik gullar qo’yib chiqilsa ham bo’lardi-ku!
— Siz haqsiz. Ammo restoranimiz vegetarianlar uchun xizmat qila boshlagach, mijozlar tirik gullarni gazak deb o’ylab yeb qo’yadigan bo’lishdi.
* * *
Homilador ayol eriga dedi:
— Agar tug’ilajak bolamiz sizga o’xshasa, demak, baxtsiz bo’ladi!
— Agar shu bolang menga o’xshamasa, sen baxtsiz bo’lasan!
* * *
Ikki qarg’a daraxt shoxida o’tirishgandi. Tepalaridan reaktiv samolyot uchib o’tib ketdi. Qarg’alarning biri ikkinchisidan so’radi:
— Menga qara, jo’ra, nega anavi qush bunchalik tez uchadi-a?
— Sening duminggayam o’t qo’yvorishsa, ko’rardim qanday uchishingni!
* * *
— Do’xtir, yordam bering! Muammo paydo bo’ldi!
— Nima bo’ldi?
— Nuqul tirnoqlarimni tishlashga odatlanib qoldim. Sira shu odatimni tashlay olmayapman!
— Buning yo’li oson! Hozir tishlaringizni sug’urib tashlayman!
* * *
Vrach mehmonda o’tiribdi va unga so’z berishdi. U shunday dedi:
— Bu dunyoda biz vrachlarning juda dushmanimiz ko’p!
Shu payt boshqa bir stol tarafdan ovoz keldi:
— Narigi dunyoda yanayam ko’p.
Olimjon HAYIT tayyorladi
Olimjon Hayitning turli mavzulardagi xabarlari, maqolalari, hikoyalari endi «Telegramm» dagi alohida kanalda! Bizga qo’shiling, afsuslanmaysiz!
t. me/olimjonhayit
