Bahodir Jalolovning navbatdagi jangi sanasi va raqibi ma'lum bo'ldi

Professional boksning super og’ir vazn toifasida harakat qilayotgan Bahodir Jalolov (11-0, 11 KO) o’zining navbatdagi jangini amerikalik Kyortis Harperga (14-8, 9 KO) qarshi o’tkazadi. Bu haqda rasman e’lon qilindi.

Jang 26 noyabr kuni AQShning Kaliforniya shtatida o’tkaziladigan boks oqshomida bo’lib o’tadi.

Kechaning asosiy jangi birinchi yarim o’rta vazn toifasida vakant turgan WBC chempionlik kamari uchun Rejis Progreys va Xose Sepeda o’rtasida bo’lib o’tadi.

Avvaliga Jalolov 15 oktyabr kuni Liverpuldagi boks oqshomida jang qilishi aytilgandi. Biroq Bahodirga raqib topilmadi va uning ishtirokidagi jang bekor bo’ldi.

Jalolov so’nggi jangini iyun oyida o’tkazib, unda belgiyalik Jek Mulovayini muddatidan avval mag’lub etgandi. Kyortis Harper esa oxirgi marta iyul oyida ringga chiqib, Kristian Tun ustidan g’alabaga erishgan.