Turk Egeyning uchta eng go’zal orollari Go’kcheada, Bozjaada va Junda, asrlar davomida Egeyning tabiiy boyliklari bilan sayyohlarini qarshi olib kelmoqda. Orollarda kunlar: tosh uylarda, mazali turk nonushtalari tanavvuli bilan boshlanadi, mayin qumli sohillardagi dengizda suzish bilan davom etadi va mahalliy restoranlarda yoqimli kechki ovqatlar bilan tugaydi. Dasturxonlar Egey mintaqasining ko’p asrlik milliy taomlari bilan to’lib-toshgan bo’lsada, birinchi navbatda «meze» ya’ni yengil gazaklar beriladi; so’ng orolning mashhur dengiz mahsulotlari dasturxoningizdan joy oladi. Xo’sh, ushbu orollardan sizga eng mos keladigani qaysi? Mana, qaror qabul qilishingizga yordam beradigan ba’zi maslahatlar…
Bozjaada: shovqinli shahardan «qochish»ni istaganlar uchun
Bozjaada, Chanoqqal’a qirg’og’ida topilgan, bugungi kungacha yaxshi saqlanib qolgan Egey marvarididir. Mifologik matnlarda Tenedos nomi bilan tanilgan Bozjaada, o’zining tiniq suvlari, uzumzorlari va vinolari bilan diqqatni tortadi. Bo’zjada qal’asi orolga kelganingizda ko’rinadigan birinchi diqqatga sazovor joy bo’lib, unga Geyikli portidan jo’naydigan paromlar orqali osonlik bilan borish mumkin. Siz ushbu qal’aga tashrif buyurib, orolning ajoyib manzaralarini suratga olishingiz mumkin. Orolning diqqatga sazovor joylari orasida Bozjaada muzeyi, Ayazma monastiri, shamol tegirmonlari va Bibi Maryam cherkovi mavjud. Ayazma sohili va Akvarium ko’rfazi oroldagi eng mashhur suzish joylaridan ikkitasidir. Bozjaada shuningdek, turli xil ochiq havo mashg’ulotlarini ham taklif etadi. Chayir sohilida shamol va dengizdan bahramand bo’lishingiz yoki sokin ko’rfazlarda moviy tubliklarga sho’ng’ib, suv osti hayotini kashf qilishingiz mumkin. Bozjaadada qilinadigan yana bir narsa, orolning eng g’arbiy uchidagi Polente dengiz chirog’i va shamol tegirmonlarini ziyorat qilishdir. Bozjaada uzumzorlari va 3000 yillik vinochilik an’analari bilan noyob bog’ yo’nalishlarini ham taklif etadi. Bozjaada bog’ yo’nalishida siz vino zavodlariga tashrif buyurib, orolning to’rtta endemik uzum navlaridan vinolarni tatib ko’rishingiz mumkin. Shuningdek, orolda har yili sentyabr oyining birinchi haftalarida uzumzorlar festivali o’tkaziladi.
Dunyodagi birinchi va yagona «Cittaslow» oroli: Go’kcheada
Shimoliy Egeyda, Gelibolu yarim oroli yaqinidagi Go’kcheada, o’zining qishloqlari, iliq shamollari, yaylovlarda o’tlab yurgan echkilari, toza dengizi va uzun sohil chiziqlari bilan o’ziga xosdir. Bu barcha xususiyatlar bilan orol 2011 yildan beri dunyodagi birinchi va yagona «Cittaslow» oroli deb topildi. Turkiyadagi eng go’zal sohillarga ega bo’lgan yo’nalishlardan biri sanalgan Go’kcheada, uzun sohil chiziqlari va feruza rang suvlarida sho’ng’ish, so’rfing va suzish imkoniyatlarini taqdim etadi. Orolda 300 kun davomida shamol so’rfingi uchun mukammal sharoitlar mavjudligiga guvoh bo’lgach, nima uchun har yili minglab so’rfchilar Go’kcheadaga tashrif buyurishlarini tushunib yetasiz. 1200 metr uzunlikdagi sohili va Go’kcheadadagi oltin qumi bilan Aydjik sohilida suzishingiz va shamol so’rfi bilan shug’ullanishingiz mumkin. Go’kcheada o’zining me’morchiligi va oshxonasi bilan ham mashhur. Orolning eng jozibali qishloqlari bo’lgan Kaleko’y, Zeytinli, Tepeko’y, Bademli va Dereko’y ko’p asrlik daraxtlari, tepaliklari va o’ziga xos tosh uylari bilan maftun etadi. Qishloqlardagi mehmonxonalar, kafe va restoranlar vazifasini bajaruvchi yangilangan tosh binolar o’z ko’zingiz bilan ko’rishga mutlaqo arziydi.
Turk Egey afsonasi: Junda
Shimoliy Egey dengizidagi har faslda betakror bo’lgan orol Junda, Ali Bey oroli sifatida ham tanilgan. Qisqa ko’prik orqali materik bilan bog’langan Junda transportdan juda uzoqda joylashgan. Taksiyarhis cherkovi orolning diqqatga sazovor joylaridan biridir. 2011 yildagi qayta ta’mirdan so’ng, 1873 yilda qurilgan neoklassik cherkov o’zining asl go’zalligini tikladi: bugungi kunda bino Ayvalik Rahmi M. Koch muzeyi sifatida faoliyat olib boradi. Oshiqlar tepaligidan manzarani tomosha qilish, zinapoyadan iborat Arnavut ko’chalarida sayr qilish, tosh uylar hovlisida Junda noz-ne’matlaridan tatib ko’rish, orolning mashhur tiniq suvlarida (Akvarium yoki Yashil ko’rfaz) suzish, butun orolni qizilga bo’yagan quyosh botishini tomosha qilish shular jumlasidandir. Junda o’zining mazali taomlari va vitaminlarga boy o’tlardan tayyorlangan salatlari bilan mashhur. Dengiz bo’yida quyosh botishini tomosha qilayotib, samfir (dengiz no’xati) va artishok kabi orolning zaytun moyida tayyorlangan taomlarini tatib ko’rishni unutmang. Shuningdek, Jundaga sayohatingiz davomida orolning o’ziga xos balig’i bo’lgan papalinani tatib ko’rishingiz mumkin.
