Oltin narxi yangi tarixiy rekord o‘rnatib, ilk bor unsiyasi uchun 3200 dollardan oshdi. Chikago tovar birjasida (CME) fyucherslar narxi kecha, 2 aprel kuni savdolar yopilish arafasida 1,77 foizga oshib, eng yuqori cho‘qqida 3201,6 dollarga yetdi. Bu haqda birja saytida keltirilgan.
2 aprel savdolari yakunlariga ko‘ra, oltin narxi 3166,2 dollarni tashkil etgan va bu avvalgi kundagi darajadan 0,64 foiz yuqori. Bugun, 3 aprel kuni ertalab qimmatbaho metall oldingi kun yopilish narxlari atrofida sotilmoqda. Toshkent vaqti bilan 09:05 da fyucherslar 0,15 foizga oshib, unsiyasi uchun 3170,9 dollarni tashkil etgan.
Oltin bozorida keskin o‘sish AQSH Prezidenti Donald Tramp yangi import bojlarini e’lon qilganidan keyin yuz berdi. Tramp joriy qilgan bojlar minimal tarif 10 foizni tashkil etdi, ayrim davlatlarga nisbatan boj miqdori 50 foizgacha yetdi.
“Bloomberg” nashrining yozishicha, bu chora-tadbirlar AQSH harakatlari jahon iqtisodiyotining sekinlashishiga sabab bo‘lishi mumkinligi haqidagi xavotirlarni kuchaytirgan. Oqibatda investorlar xavfsiz aktivlar qatoriga kiruvchi oltinga yuzlanmoqda. Bu esa qimmatbaho metall narxining oshishiga turtki berdi.
“Oltin bozoridagi “buzoqcha” (o‘sish tendensiyasidagi) dinamika bojlar bilan bog‘liq xavotirlarni aks ettiradi. Ushbu tariflar iqtisodiy o‘sishni susaytirishi va iqtisodiy ko‘rsatkichlarning pasayishiga olib kelishi mumkinligi haqidagi xavotirlar oltinni qo‘llab-quvvatlamoqda”, dedi WisdomTree kompaniyasining xomashyo bo‘yicha strategi Nitesh Shah.
Joriy yilning o‘zida oltin narxi 21 foizdan ortiq o‘sdi. O‘tgan yili esa narx 27 foizdan ko‘proq oshgan bo‘lib, bunga “yumshoq” pul-kredit siyosati, markaziy banklarning faol xaridlari va investorlarning xavfsiz aktivlarga bo‘lgan talabi sabab bo‘lgan. Goldman Sachs tahlilchilarining taxminlariga ko‘ra, yil oxiriga kelib oltinning narxi 3300 dollar/untsiya ga yetishi mumkin. Markaziy banklar tomonidan kutilganidan yuqori talab va qimmatbaho metallar bilan ta’minlangan birja investitsiya fondlariga mablag‘lar oqimining sezilarli darajada oshishi kutilmoqda. Morgan Stanley tahlilchilari ham oltin bozoridagi o‘sish hali tugamaganini va 2025 yilda oltin narxi 3400 dollar/untsiya ga yetishi mumkinligini istisno qilmayapti.
Eslatib o‘tamiz, mart oyi o‘rtalarida Chikago tovar birjasida aprel oyiga mo‘ljallangan fyucherslar 0,34 foizga oshib, unsiyasi uchun 3001,62 dollarga yetgandi va shu tariqa birja narxi birinchi marta unsiyasi uchun 3000 dollar chegarasidan oshgan edi.
