* * *
— Allo! Bu jonivorlarni himoya qilish jamiyatimi?
— Ha.
— Tez xodimingizni biznikiga jo’nating!
— Nega?
— Pochtachi daraxtga chiqib olib itimni haqorat qilyapti.
* * *
Militsiya bo’limiga rangi oqarib ketgan erkak kelib dedi:
— Yordam bering! Uyimga o’g’ri tushdi! Iskovich it jo’natinglar!
— Uzr, buning iloji yo’q.
— Nega?
— Iskovich itlarimiz militsiya bo’limidagi bufetdan kolbasa o’g’irlagani sababli qamoqqa olingan.
* * *
Olti yashar bolakay bobosiga dedi:
— Bugun kechasi mushugimizning tug’ilgan kuni bo’ldi.
— Ie, bu gapni qaerdan olding?
— Ha-a, shunday bo’ldi. Yarim kechasi hovliga ko’-o’p mushuklar to’planib rosa ashula aytdi.
* * *
Olti yashar bolakay sigir sug’orayotgan odamni kuzatib turdi-da, o’zicha mulohaza qildi:
— Ha-a, sigir sutiga suvni shunday yo’l bilan aralashtirishar ekan-da!
* * *
— Azizim, yangi yilda menga nima sovg’a qilasiz?
— Hech narsa sovg’a qilmasam-chi?
— Unda 14 yanvarda siz ham hech qanday sovg’a olmaysiz!
— Rostdanmi? Kelishdik!
* * *
— Og’ayni, qalbingda yagona orzung bormi?
— Bor.
— Qanday?
— Zararli odatlarni tashlash.
— Unda tashlayqol!
— Ie, unda orzusiz qanday yashayman?
* * *
Qushlar ko’rgazmasida uchta to’tiqush sotuvga qo’yilgan. Birining narxi yuz ming, ikkinchisiniki besh yuz ming, uchinchisiniki esa bir million so’m. Xaridorlardan biri so’radi:
— Nega manavi to’tining narxi yuz ming so’m?
— U ikkita tilda bemalol gapiradi.
— Besh yuz ming so’mligi-chi?
— U uchta tilda gapiradi.
— Xo’p, u holda anavi to’tining narxi nega bir million so’m? U qanday karomat ko’rsatadi?
— Hech qanday karomat ko’rsatmaydi. Bu to’ti anavi ikkalasining boshlig’i.
* * *
Kaptarboz do’stiga maqtandi:
— Men kaptarimni to’tiqush bilan chatishtirdim.
— Nega?
— Tug’ilgan kaptar xatni olisga olib ketayotib, adashib qolsa, sira ikkilanmay to’g’ri yo’lni so’rab oladigan bo’ladi.
* * *
Ayol dugonasiga dedi:
— Yaramas erim bilan ajrashganimga bir yil bo’ldi. Har kuni ko’z yosh to’kib menga qo’ng’iroq qiladi.
— Kechirim so’raydimi?
— Yo’q, ajrashganim uchun minnatdorchilik bildiradi.
* * *
Xotin eridan so’radi:
— Meni sevasizmi?
— Albatta.
— Basharti sizga xiyonat qilsam, kechira olarmidingiz?
— Ie, qiziqchimisan? Marhumlarni kechirmay bo’larkanmi?!.
Olimjon HAYIT tayyorladi
Olimjon Hayitning turli mavzulardagi xabarlari, maqolalari, hikoyalari endi “Telegramm” dagi alohida kanalda! Bizga qo’shiling, afsuslanmaysiz!
t.me/olimjonhayit
