Haqiqiy hangomaning bundan battari bo’lmaydi, brat!..

 

 

* * *

 

Uch yigit bir-biriga maqtanyapti.

Birinchisi: — Men o’tgan yili yuz metr tepalikdan dengizga o’zimni tashlaganman.

Ikkinchisi: — Be, shuyam gap bo’ldimi? Men o’tgan yili samolyotda ketayotib, umrimda birinchi marta o’n ming metr yuqoridan parashyutda sakradim.

Uchinchisi (ma’yus kulimsirab): — Men maoshdan orttirgan pullarimni dollardamas, so’mda saqlayman.

 

* * *

 

Erkak yashash joniga tegib, ko’prikdan o’zini daryoga otmoqchi bo’lib turgandi, kimdir orqadan kelib yelkasiga qo’lini qo’ydi va dedi:

— Mana shu mushukniyam o’zingiz bilan olib tushib keta qoling, iltimos!

 

* * *

 

Xotin kurortda dam olib qaytgach, eridan gumonsirab karavotlar-u, uning kiyimlari-yu, shkafdan tortib, idishlargacha tekshirib ko’rdi. Begona ayoldan qolgan izlarni, soch tolasini topa olmadi va eridan so’radi:

— Nima balo, endi kal ayollar bilan uchrashishga o’tdingizmi?

 

* * *

 

Arman radiosidan so’rashdi:

— Qanday erkakni dunyodagi eng baxtli erkak deb hisoblash mumkin?

— Xotini 8 martda tug’ilgan, to’ylari ham xuddi shu kuni bo’lib o’tgan erkakdan baxtlisi bo’lmasa kerak.

 

* * *

 

— Dugonajon, qanday qilib shunchaga oza olding? Parhez tutdingmi? Mengayam ayt!

— Ha, yangi parhez.

— Aytaqol mengayam!

— Kartoshka, sabzi!

— O’, buni nima qilish kerak? Qaynatib yeymi, qovuribmi?

— Yeyish kerak emas, kovlash kerak, dugonajon, kovlash kerak!

 

* * *

 

Xotin qo’shni ayolnikida laqillashib o’tirgandi. Yana eri qo’ng’iroq qildi. Ayol zarda aralash dedi:

— Namuncha qo’ng’iroq qilavermasangiz? Men qo’shni ayolnikidaman! Besh minutda chiqaman dedim-ku! Har yarim soatda qo’ng’iroq qilib xit qilaverasizmi?

 

* * *

 

Piyonistaning olti yashar o’g’li ko’chadan yugurib uyiga kirdi-da, onasiga dedi:

— Oyi, hushyorxona yonib ketibdi!

— Sen qaerdan bila qolding?

— Dadam ko’chada kelayotib, «Dushmanlarim yoqdi ona uyimni» deb ashula aytyapti.

 

* * *

 

Konservatoriyada imtihon ketyapti. Professor imtihon topshiruvchi yigitdan so’radi:

— Siz Chaykovskiyning sakkizinchi simfoniyasini eshitganmisiz?

Talaba (g’urur bilan): — Albatta eshitganman.

Professor (norozi bosh chayqab): — Afsus, imtihondan o’ta olmadingiz.

Talaba: — Nega?

Professor: — Chunki Chaykovskiy atigi oltita simfoniya yozgan.

 

* * *

 

Bolakay ko’chada onasiga qichqirdi:

— Oyi, qarang, men velosipedimni qo’lsiz haydayapman!

Oradan sal o’tmay, ortga qaytib keldi-da, onasiga yig’lamsirab qichqirdi:

— Oyi, qalang, velosipedimni tissiz haydayapman!

 

* * *

 

Yangi boyning besh yashar qizchasi oyisidan so’radi:

— Oyi, farishtalarning qanoti bormi?

— Ha.

— Ular ucha oladimi?

— Albatta. Nega farishtalar bilan qiziqib qolding? Tinchlikmi?

— Kecha dadam uy xizmatchimiz Tojinisa opani «farishtam» dedi. Tojinisa opa qachon uchadi?

— Ertagayoq uchib ketadi, qizim, ertagayoq!

Olimjon HAYIT tayyorladi