Pink Floyd hammuassisi Rojer Uoters advokatlarga uning Germaniyadagi konsertlari o’tkazilishiga ishonch hosil qilishni buyurdi.
Avvalroq OAV musiqachining 28 may kuni Frankfurtdagi chiqishi mahalliy yarmarka aksiyadorlari tomonidan bekor qilishga qaror qilingani, uning 21 may kuni Myunxenda bo’lib o’tadigan konserti borasida muhokamalar davom etayotgani haqida xabar berilgandi.
Berilgan sabablar orasida Uotersning Putin va BDS harakatini qo’llab-quvvatlovchi bayonotlari (Falastinga nisbatan siyosati tufayli Isroildan tovarlarni boykot qilish), shuningdek, «antisemitizm» ham bor.
Musiqachi oxirgi ayblovni yolg’on deb hisoblaydi. Uning vakillari konsertning bekor qilinishini «konstitutsiyaga zid» va «asossiz» qaror deb atamoqda, deb yozadi Hessenschau.
